lög KLÚBBSINS
Lög Newcastle klúbbsins, kt. 5203033670.
Lög Newcastle klúbbsins á Íslandi
Kennitala: 520303-3670
Stofnaður 18. febrúar 2003
1. grein
Heiti klúbbsins er Newcastle United klúbburinn á Íslandi. Heimili hans og varnarþing er í Reykjavík.
2. grein
Hlutverk klúbbsins er að safna saman íslenskum aðdáendum Newcastle United Football Club á Englandi í einn klúbb á Íslandi.
3. grein
Tilgangi sínum hyggst klúbburinn ná með margs konar starfsemi, svo sem almennu félagsstarfi í kringum beinar útsendingar, rekstri heimasíðu á internetinu, hópferðum á leiki Newcastle United FC á St. James’ Park og víðar, upplýsingamiðlun um félagsstarfið á Facebook og viðburðum tengdum félaginu, svo sem árshátíð félagsmanna.
4. grein
Fullgildir félagsmenn í klúbbnum geta orðið þeir sem skrá sig og greiða árgjaldið.
Greiðslutímabil félagsgjalda skal vera frá ágúst til maí.
Félagsmenn fá úthlutað félagsnúmeri sem þeir halda ævilangt.
5. grein
Rétt til setu og atkvæða á fundum klúbbsins hafa allir fullgildir félagsmenn.
6. grein
Heimilt er að víkja félagsmönnum úr klúbbnum ef þeir brjóta reglur eða koma ósæmilega fram í ferðum eða í nafni klúbbsins, að mati meirihluta stjórnar.
7. grein
Félagsgjald skal greitt árlega og skal upphæð þess ákveðin á aðalfundi. Innheimta félagsgjalda skal hefjast við upphaf keppnistímabilsins á Englandi.
8. grein
Reikningsár klúbbsins er frá 1. ágúst til 31. júlí og miðast við keppnistímabil enska boltans.
Ársreikningar skulu skoðaðir og undirritaðir af skoðunarmanni klúbbsins eigi síðar en tveimur vikum fyrir aðalfund í ágúst.
9. grein
Aðalfund klúbbsins skal halda í byrjun ágúst ár hvert.
Til aðalfundar skal boða með tryggum hætti með minnst fjórtán daga fyrirvara. Atkvæðisrétt hafa aðeins fullgildir félagsmenn. Á aðalfundi ræður meirihluti atkvæða afgreiðslu mála nema annað sé sérstaklega tekið fram í lögum þessum.
10. grein
Dagskrá aðalfundar skal vera:
Fundur settur.
Skipan fundarstjóra og fundarritara.
Kannað kjörgengi fundarmanna.
Skýrsla stjórnar.
Ársreikningar og álit skoðunarmanns.
Umræður um skýrslu stjórnar og ársreikninga.
Lagabreytingar.
Kosning formanns til tveggja ára, annað hvert ár.
Kosning tveggja stjórnarmanna til tveggja ára.
Kosning tveggja til fjögurra varamanna í stjórn til eins árs.
Kosning skoðunarmanns. Skoðunarmaður má ekki sitja í stjórn klúbbsins.
Ákvörðun félagsgjalds.
Fjárhagsáætlun.
Önnur mál.
Fundarslit.
11. grein
Lögum klúbbsins verður aðeins breytt á aðalfundi félagsins.
Tillögum að lagabreytingum skal skila skriflega til stjórnar minnst fjórtán dögum fyrir aðalfund. Stjórn skal kynna framkomnar lagabreytingartillögur á heimasíðu klúbbsins og Facebook-síðu hans með minnst sjö daga fyrirvara.
Nái lagabreytingartillaga samþykki þriggja fjórðu hluta fundarmanna telst hún samþykkt.
12. grein
Stjórn klúbbsins skipa formaður og fjórir meðstjórnendur ásamt aðilum í nefndum og ráðum.
13. grein
Stjórn skiptir sjálf með sér verkum.
14. grein
Annað hvert ár, það er þau ár sem enda á oddatölu, skal kjósa formann til tveggja ára í senn.
Á hverjum aðalfundi skal kjósa tvo meðstjórnendur til tveggja ára þannig að alltaf sitji áfram tveir stjórnarmenn úr fyrri stjórn. Stjórnarmenn sem láta af embætti geta boðið sig fram aftur til stjórnarstarfa fyrir klúbbinn.
15. grein
Stjórn klúbbsins ræður málefnum hans á milli aðalfunda, með þeim takmörkunum sem lög þessi setja. Stjórnin tekur ákvarðanir um starfsemi klúbbsins og ber ábyrgð á fjárreiðum hans og skuldbindingum.
16. grein
Stjórnarfundur er ályktunarhæfur þegar meirihluti stjórnarmanna sækir fund. Afl atkvæða ræður úrslitum á stjórnarfundum. Falli atkvæði jafnt ræður atkvæði formanns.
17. grein
Komi fram tillaga um að leggja klúbbinn niður skal boða til annars fundar innan mánaðar. Ákvörðun þess fundar skal vera endanleg.
Við slit klúbbsins skulu eignir hans renna til góðgerðarmála að ákvörðun stjórnar.
Lög þessi voru upphaflega samþykkt á aðalfundi félagsins 2. desember 2023.
Breytingar á lögunum voru samþykktar á aðalfundi félagsins 15. ágúst 2025.
Newcastle klúbburinn á Íslandi
Kt. 520303-3670
nufc@nufc.is