Newcastle áfram í deildabikarnum

Newcastle United tryggði sér sæti í 16-liða úrslitum enska deildabikarsins með öruggum 4:1-sigri á Bradford City á St James’ Park í gærkvöld.

Gestirnir, sem sitja á toppi ensku C-deildarinnar, mættu með fjölmenna fylkingu stuðningsmanna og byrjuðu leikinn af krafti. Aaron Ramsdale, sem lék sinn fyrsta leik í marki Newcastle, þurfti að verja strax á fyrstu mínútu eftir skot frá Brad Halliday. Stuttu síðar átti Bobby Pointon gott skot sem Ramsdale varði einnig.

Eftir þetta tóku heimamenn öll völd á vellinum. Joelinton kom Newcastle yfir á 17. mínútu eftir laglegt samspil og aðeins tveimur mínútum síðar tvöfaldaði William Osula forystuna með góðu marki eftir sendingu frá Bruno Guimarães. Sama tvíeyki var áfram áberandi í sóknarleik heimamanna og Sam Walker í marki Bradford hafði nóg að gera í leiknum.

Joelinton bætti öðru marki sínu við á 75. mínútu og þar með sjötta marki sínu í keppninni frá upphafi. Andy Cook, stuðningsmaður Newcastle, minnkaði muninn fyrir Bradford með góðu skoti en Osula tryggði endanlegan 4:1-sigur með marki í blálokin.

Newcastle heldur því áfram í keppninni sem liðið vann í vor og Eddie Howe og lærisveinar hans geta horft bjartsýnir til áframhaldandi þátttöku í bikarnum. Newcastle mun mæta Tottenham á heimavelli í 16-liða úrslitum keppn­inn­ar þann 27. október næstkomandi.

Svipmyndir úr leiknum