Sigur gegn WBA í bikarnum

Newcastle er komið áfram í deildabikarnum eftir 3-2 sigur á West Brom á St James’ Park í gærkvöldi. Þetta var ekki sérstaklega sannfærandi, en bikarleikir eru sjaldnast geymdir í minningunni fyrir fallegustu 90 mínúturnar. Það sem skiptir máli er að vera með í næstu umferð.

West Brom komst yfir snemma leiks með frábæru aukaspyrnumarki frá Isaac Price, en Newcastle svaraði fyrir hlé. Bazoumana Touré skoraði þá sitt fyrsta mark fyrir félagið eftir góða fyrirgjöf frá Amar Dedić.

Harvey Barnes kom inn í hálfleik og þurfti aðeins nokkrar mínútur til að koma Newcastle yfir. Þá virtist þetta loksins vera að færast í eðlilegt horf, þar til West Brom fékk víti og Price jafnaði í 2-2.

Barnes var þó ekki búinn.

Dedić átti aðra frábæra sendingu inn á teiginn á 81. mínútu og Barnes kláraði færið. Tvö mörk af bekknum hjá Barnes og tvær stoðsendingar hjá Dedić sáu til þess að Matthias Jaissle fékk sinn fyrsta sigur í keppnisleik með Newcastle.

Það var helst frammistaða nýju mannanna sem gladdi. Touré komst á blað, Dedić var áberandi og fyrir leik var Nico González kynntur til leiks eftir komu sína frá Manchester City. Það er því enn talsverð breyting í gangi hjá liðinu og varla hægt að búast við því að allt verði fullkomið strax.

En fyrsti sigurinn er kominn og Newcastle er áfram í bikarnum. Í þriðju umferð bíður Millwall á útivelli, sem verður væntanlega allt annað en þægilegt kvöld á The Den.

Byrjunarlið Newcastle United: Ewen Jaouen, Lewis Hall, Sven Botman, Malick Thiaw (f), Amar Dedić, Jacob Ramsey, Sean Steur (Lewis Miley 65'), Bazoumana Touré (Harvey Barnes 46'), Joe Willock (Yoane Wissa 64'), Jacob Murphy (Anthony Elanga 64'), Nick Woltemade

Varamenn: Lukáš Horníček, Fabian Schär, Aladji Bamba, Leo Shahar, Sean Neave