Hetjuleg barátta en Barcelona hafði síðasta orðið

Newcastle United hóf þátttöku sína í Meistaradeild Evrópu í kvöld með 2:1-tapi gegn Barcelona á St James’ Park. Marcus Rashford, sem er á láni hjá Barcelona frá Manchester United, skoraði bæði mörk gestanna í seinni hálfleik áður en Anthony Gordon minnkaði muninn undir lokin.

Newcastle hóf leikinn af krafti og náði að skapa sér góð færi í fyrri hálfleik. Bruno Guimarães átti frábæra sendingu á Anthony Elanga sem lagði boltann fyrir Harvey Barnes, en markvörðurinn Joan García varði vel. Gordon átti einnig gott skot snemma leiks, en gestirnir ógnuðu með tilraunum frá Rafinha og Robert Lewandowski.

Fyrri hálfleikurinn var markalaus en Barcelona komst yfir á 58. mínútu þegar Rashford stangaði boltann í netið eftir fyrirgjöf frá Jules Koundé. Níu mínútum síðar bætti hann við með glæsilegu skoti utan teigs sem small í slána og fór inn.

Eddie Howe gerði fjórfalda skiptingu til að bregðast við og reyna að blása nýju lífi í leikinn, en Barcelona hélt fast í stjórnina. Gordon náði þó að skora á lokamínútu leiksins eftir góða fyrirgjöf frá Jacob Murphy og gaf stuðningsmönnum von um dramatíska lokasókn. Gestirnir vörðust hins vegar vel og tryggðu sér sigur.

Þrátt fyrir tapið sýndi Newcastle ákveðni og baráttu gegn einu besta liði Evrópu og á liðið því áfram góða möguleika þegar líður á tímabilið í Meistaradeildinni.

Sviðmyndir koma inn síðar