Newcastle sækir Villa heim í bikarnum

Newcastle United sækir Aston Villa heim á Villa Park-leikvanginum í fjórðu umferð enska bikarins annað kvöld. Um er að ræða einvígi tveggja úrvalsdeildarliða þar sem bæði lið sjá tækifæri til að komast langt í elstu bikarkeppni heims.

Newcastle kemur til leiks eftir mikilvægan 2:1-útisigur á Tottenham í deildinni í vikunni. Sá sigur kom á hárréttum tíma fyrir lið Eddie Howe sem hafði aðeins unnið einn af átta leikjum sínum í öllum keppnum þar á undan. Howe sagði á blaðamannafundi að viðhorfið til bikarkeppninnar væri skýrt; félagið vilji vinna hana og fara eins langt og kostur er. Hann viðurkenndi þó að útileikur gegn Villa væri erfiður dráttur.

Óvissa ríkir um þátttöku nokkurra lykilmanna. Bruno Guimarães glímir við meiðsli aftan í læri og beðið er nánari fregna af ástandi hans. Lewis Miley fékk þungt högg á læri og er metinn dag frá degi. Þá er ólíklegt að Joelinton verði orðinn leikfær, en hann er þó sagður nálgast endurkomu. Varnarmaðurinn Tino Livramento er á batavegi og stefnt er að því að hann snúi aftur í mars. Howe hrósaði jafnframt framlagi Kieran Trippier og sagði forystu hans í varnarleiknum afar mikilvæga.

Villa-liðið, sem er undir stjórn Unai Emery, situr í þriðja sæti deildarinnar og hefur verið afar sterkt á heimavelli á tímabilinu. Liðið lagði Brighton að velli í vikunni og hefur þar með styrkt stöðu sína í baráttunni um Meistaradeildarsæti. Villa vann Newcastle 2:0 í síðustu viðureign liðanna og er ósigrað í síðustu þremur leikjum liðanna í öllum keppnum.

Sagan í enska bikarnum er rík hjá báðum félögum. Newcastle hefur unnið keppnina sex sinnum og Villa sjö. Þó hafa liðin ekki náð miklum árangri í keppninni undanfarin ár og því er ljóst að tækifæri gefst nú til að blása nýju lífi í bikardrauma stuðningsmanna.

Leikurinn hefst klukkan 17.45 og verður í beinni útsendingu á Sýn Sports Viaplay.