Ramsdale orðinn leikmaður Newcastle

Newcastle United hefur tryggt sér markvörðinn Aaron Ramsdale á lánssamningi frá Southampton út tímabilið. Newcastle er með for­kaups­rétt að lán­inu loknu.

Ramsdale, sem er 27 ára, lék síðast með Southampton eftir að hafa verið keyptur þaðan frá Arsenal á síðasta ári.

Ramsdale naut sín vel á árum sínum hjá Arsenal og hjálpaði liðinu meðal annars að ná öðru sæti í ensku úrvalsdeildinni tímabilið 2022-23. Sama ár lék hann sinn fyrsta A-landsleik fyrir England og fór með liðinu á heimsmeistaramótið í Katar.

Áður hafði hann leikið með Sheffield United og Bournemouth, þar sem Eddie Howe, núverandi stjóri Newcastle, gaf honum fyrsta tækifærið í ensku úrvalsdeildinni árið 2019. Hann hefur spilað 183 leiki í ensku úrvalsdeildinni, þar af haldið hreinu í 41 leik.

„Ég er gríðarlega ánægður að vera kominn til Newcastle. Stuðningsmennirnir eru ótrúlegir og andrúmsloftið á St James’ Park er einstakt,“ sagði Ramsdale.

Eddie Howe bætti við: „Aaron er markvörður með gæði og reynslu. Ég þekki hann vel og veit nákvæmlega hvað hann kemur með inn í hópinn, innan vallar og utan.“