Thiaw orðinn leikmaður Newcastle

Newcastle United hefur staðfest kaup á varnarmanninum Malick Thiaw frá ítalska stórliðinu AC Milan. Þýski landsliðsmaðurinn, sem er 24 ára og leikur aðallega í miðvarðarstöðu, skrifaði undir langtímasamning í gær og er þriðja viðbót liðsins í sumar.

Thiaw lék 85 leiki fyrir Milan á þremur árum, þar á meðal gegn Newcastle á San Siro-leikvanginum í Meistaradeild Evrópu fyrir tveimur árum.

Hann hóf feril sinn hjá Schalke 04 í Þýskalandi og lék sinn fyrsta leik í þýsku úrvalsdeildinni aðeins 18 ára gamall. Thiaw hefur leikið þrjá A-landsleiki fyrir Þýskaland og mun klæðast treyju númer 12 hjá Newcastle.

„Ég er spenntur að hefja æfingar og hitta nýju liðsfélagana mína,“ sagði Thiaw. „Þjálfarinn sýndi mér sína framtíðarsýn og mig langar að vera hluti af þessu verkefni.“

Eddie Howe, stjóri Newcastle, sagðist ánægður með að fá leikmann sem býr yfir reynslu úr Meistaradeildinni, auk leikja í bæði þýsku úrvalsdeildinni og ítölsku A-deildinni.